絲絲講場：花旗投資講座 露「玄」機
每逢市場上有人民幣新產品推出，銀行都乘勢搞活動做推介。近期市場最關注嘅產品，咪就係呢兩年等到頸都長嘅RQFII，花旗香港就乘勢請齊測市專家開騷，有銀行界同基金界講解產品，連玄學界大師李丞責都出動埋。
介紹RQFII 李丞責有份
話說花旗香港賣緊5款RQFII產品，佢搞咗個「RQFII與中國投資機遇」投資講座，請咗其中4間負責管理呢批RQFII基金嘅公司代表，講吓有咩投資焦點，唔少得花旗香港環球個人銀行服務投資策略及研究部主管張敏華，分析吓內地投資大勢同大市展望啦。
玄學測市 拍得住專家
不過相信最吸引聽講座嗰300個客嘅，應該係著名玄學家李丞責，皆因近排有唔少數據顯示，玄學家測市唔差得過大型金融機構嘅分析師，甚至好多外資大行近年都開始用風水角度測市，李丞責亦都乘住RQFII個勢，分析中國和香港的地運及龍年投資運。
余絲韻