金行長卸任在即，英國財相歐思邦為搵接班人非常頭痕，仲想打破三十年來嘅傳統，喺央行以外物色人選，搵個有銀行經驗嘅專才出任，打救一病不起嘅銀行體系，三月之後開始篩選。
葛霖冼博德都有機
邊個會跑出要到今年尾至有分曉，一眾經濟師就估，依家做官嘅葛霖、前巴克萊行政總裁瓦利（John Varley），英國金融服務局主席特納（Adair Turner）都係公務員嘅心水，會推介畀歐思邦。冼博德、令英國銀行業周身唔得閒嘅英國銀行業獨立委員會揸弗人John Vickers，亦都喺名單之列。另外，英倫銀行副行長Paul Tucker亦不容忽視。大家實力都有番咁上下，絲絲都好難估最後會由邊個掌舵喇。