七大經紀會尋日舉行新春團拜，人山人海，唯獨港交所（00388）主席夏佳理同行政總裁李小加雙雙因事缺席，係咪同班中小經紀不滿港股加時有關呢？絲絲就不得而知喇，但班經紀的確有所行動，已經決定咗喺港交所今個月二十九日舉行董事局會議之前，作「垂死掙扎」。證券及期貨從業員工會已決定咗喺二十八日，即係開董事局會議之前一日，再次上街遊行示威抗議港股加時，企圖向港交所施壓。
該會會長林德明同絲絲講，今次會號召七大經紀會加入一起遊行，初步已獲部分經紀會同意，佢好希望能夠團結業界，一齊要求港交所暫時擱置第二階段港股加時，並且重新再諮詢市場意見。
上一次該會搞既遊行已經有幾百人參加，林德明好有信心，今次遊行人數會比上次為多。今次「遊街」路線，會同上次去港交所交請願信唔同，今次係由遮打花園出發，遊行目的地就係新政府總部。
立法會議員詹培忠就話，好希望港交所能從善如流，維持個半鐘食飯時間，至於午休時間點安排，由港交所決定。佢總之希望，大家一人行一步，減少爭拗，無謂傷和氣嘛！
余絲韻