市場熱線：旺旺候低儲貨

希臘傳來壞消息就「小回」，一有好消息就「大漲」，港股立於不敗之地。呢排孖屐對壞消息傾向視而不見，穆迪殺得性起，話要將全世界大錢莊一次過大降級，連大笨象（00005）都有份，但全部降級反而即係冇影響。隻象仲未過到70蚊呢關，但遲早輪到，股東要畀啲耐性。

文化產業股起哄

好似QQ（00700）之前一去到190蚊就窒步，但前日破咗阻力之後，尋日見埋200蚊。Facebook上市用8億用戶做賣點，而QQ都有7億即時通訊用戶，計賺錢模式仲多過fb多多聲，但fb嘅估值係QQ嘅兩倍有多。

當然，科網股嘅估值係斷估，蘋果公司先係搵錢專家，但樹大招風畀人話佢為富不仁，所以蘋果公司搵咗富士康（02038）做sample，證明冇刻薄工人，富士康將來大條道理可以做多啲「哎乜哎物」生意，隨時又係「衰股」翻生嘅例子。不過，富士康嘅手機競爭對手比亞迪（01211）近日急回，但比亞迪嘅汽車競爭對手吉汽（00175）仍然升唔停，阿媽收購以「襟撞」出名嘅富豪汽車，吉汽似乎亦已得到「真傳」。

阿爺再提支持文化產業，一眾扮有文化嘅細價股包括文化地標（00674）、華億（00419）、漢傳媒（00491）、文化中國（01060）全部炒起，但呢類股都係一剎那嘅光輝唔代表永恒，反而一向走勢甚悶嘅新華文軒（00811）細水長流累計升咗兩成。

個市呢排慶合合，食品股同恒安（01044）之類暫時被冷落，但呢類股今年經營環境肯定有改善。當其他股份估值追上來之際，食品股又會顯得相對吸引，所以不妨儲番啲貨當長線投資。

啱放長線釣大魚

康師傅（00322）同中國旺旺（00151）一一年PE都係30倍開外，平同貴只係一個比較概念。不過，30倍PE亦有誤導成分，因為舊年原材料成本上升，而產品加價又被阿爺阻住，造成毛利率大跌。但計生意額，旺旺舊年頭半年仍有27.6%增長，假如毛利率正常嘅話，其實絕對唔算貴。

自從舊年尾通脹回落，食品股經營狀況會有好轉。旺旺同康師傅有所不同，旺旺食品屬於「優閒」類別，同胞收入增長快速，所以旺旺增長概念會稍勝一籌。雖然呢排孖屐忙於炒地主股、水泥股、懶有文化股，但旺旺尋日升2.8%亦唔失禮，買旺旺係博長線升值，因此逢低吸納最啱數。