建行（00939）董事長王洪章今年新官上任，立即四圍奔走巡視業務。絲絲聽聞佢今個星期嚟咗香港，見晒建行亞洲、建行香港分行同建銀國際3大分支機構高層，仲落埋分行視察，建行亞洲中環分行都掛埋橫幅歡迎王總添。不過嚟緊下個月就到建行派業績，絲絲估計王總都好忙，所以今個星期一嚟，但係尋日朝早已經要搭飛機走。
其實上個星期建行喺香港有唔少大事，包括建行喺香港嘅新大樓即將落成，上星期四舉行平頂儀式，建行高層都有出現，上星期五亦都舉行建行春茗，但王總都無出現，絲絲同佢緣慳一面。因為王總錯過咗上星期四嘅大樓平頂儀式，今次嚟香港，特登去咗新大樓望一望。
王總神龍見首不見尾，大家上任之後未見過佢真身，但係絲絲聽講三月底建行派完業績之後，王總好大機會再嚟香港主持業績記者會，畀投資者、分析師同傳媒見吓面。