絲絲講場:洪丕正買渣打紀念鈔都無特權

近日百年紀念鈔為全城熱話,渣打香港喺○九年都發行過150周年紀念鈔,同為全城熱搶,但渣打香港全部認購均一視同仁,就算係行政總裁洪丕正(Ben)都無特權,有朋友拍佢膊頭叫幫吓手喇,點知阿Ben話幫唔到佢,佢可能誤會阿Ben耍佢,托佢手(月爭),結果,呢位朋友之後嘅三年,都冇搵過阿Ben食飯。

珍藏30套 做慈善贊助

查實阿Ben呢鋪正一係啞子吃黃連,佢當年都係搵秘書、親朋戚友分頭行事,加埋抽到鈔票但最終放棄嘅同事,加加埋埋至湊夠三十張套連張特別版。呢批珍藏唔係用嚟炒賣,遇到慈善活動叫佢贊助禮物,佢就攞張出嚟,當捐贈禮物。

阿Ben尋日同渣打香港一班高層,喺春茗上面大玩問答比賽,其中一條壓軸問題,係估渣打香港喺二○一一年度嘅盈利係幾多,估中答案嘅,可以自選同任何一位渣打高層食飯,絲絲希望自己估中啦。

金融危機帶挈經濟師

渣打亞洲區總經濟師關家明都有去春茗,佢開咗條問題,問大家估吓過去廿幾年,香港面對過幾個金融危機,邊個最得益?絲絲以為佢講金融大鱷,佢好鬼馬咁話有三類人得益,就係經濟師、傳媒、同埋監管機構。皆因世界大亂,個個求教經濟師,傳媒最怕世界唔亂,亂完之後,就由監管機構執手尾,你睇依家監管機構出咗幾多措施!以佢做過金管局過來人身份話,當年入金管局只有3個經濟師,到後來離開時暴增至30個經濟師,真係估唔到喎!

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!