證券及期貨專業總會會長王國安一向火爆，佢近日又炮轟被政府當波咁踢。事緣佢早前因為港股加時問題發咗封公開信，質疑港交所（00388）加時為增強市場競爭力係「謬論」，封信同時寄咗畀財爺、立法會議員、財庫局同證監會。
結果係點？佢話財爺將封信彈咗畀財庫局處理，財庫局跟住又回覆話，會交番畀港交所同業界進行溝通。
換言之，搞咗一大輪，又係返番去港交所。佢炮轟話，當日封信冇寄畀港交所，係希望更上層會重視處理，結果又係還原基本步！佢感覺直情被人當波咁踢！
除咗港股加時外，王國安其實更擔心將會喺今年下半年推出嘅期指夜市，尤其係關注港交所引入嘅浮動價段機制，訂喺5%係水平過高（即賣盤價唔能夠低於正常交易時段現貨月合約最後成交價的95%，買盤價不得高於正常交易時段現貨月合約最後成交價的105%），佢希望初期運作時水平唔好訂得太高，如2.5%左右，可以先運作試吓。
佢仲話，期指夜市有好多「陰謀論」，比如可被利用作為「殺黑期」工具等等，有關方面真係唔可以掉以輕心。