絲絲講場：林書豪贏波台股有運行？
喺過去一個星期，美國NBA「哈佛小子」林書豪火速喺全球崛起，好多人為佢瘋狂。呢位効力紐約人嘅台裔籃球新星，尋日喺作客多倫多速龍嘅賽事上演絕地反擊，打敗對手。而呢股氣勢仲旺埋台股，刺激加權指數攻上8,000點大關，大升121.16點！
職棒王建民一樣旺
一個球員都可以牽動台股？冇錯。喺二○○八年嗰陣，台籍棒球手王建民係紐約洋基隊嘅當家王牌投手，人氣仲高過歌手周杰倫，只要佢贏波，台股就跟住升。後來建仔膊頭受傷畀洋基放棄咗，佢就投靠咗聯儲局主席伯南克最愛嘅華盛頓國民隊。
時隔差唔多四年，終於殺出不斷改寫NBA紀錄嘅林書豪，呢股正能量令全台受到感染。踏入龍年後表現唔錯嘅台股，就喺林書豪擔任正選開始，到依家急升咗4.1%。尋日場賽事咁精彩，台股一舉升到8,005點作收，創下五個月新高。
身價達到400萬美元嘅王建民，好快喺美國職棒開咧亮相。佢一向被視為台股嘅另類守護神，依家仲加埋林書豪，如果佢兩個齊齊贏波，咁台股咪仲有排升？
余詩韻