七大經紀會今日舉行新春團拜酒會，今次春茗就架勢喇，將會有超多人出席，場面墟冚。不過，本來係主禮嘉賓之一嘅港交所（00388）主席夏佳理，就臨時通知話因為要出門嚟唔到。有口痕友就話，唔通係「驚」咗班中小經紀唔like港股加時，突然發難要「圍」港交所？
講句公道話，夏佳理多年來身經百戰，有乜大場面未見過？
不過，港交所因為加時呢單嘢，同中小經紀關係緊張，就真係事實，淨係經紀「遊街」抗議遞信已經兩次，發表意見更多不勝數，港交所態度一於企硬，如期於下月五日實施第二階段加時。
雖然明知大勢已去，但絲絲聽聞班經紀仍然諗住作「垂死掙扎」，諗住喺下個星期三，港交所開董事會時，盡量爭取喺最後關頭表達訴求。
港交所行政總裁李小加話，會喺嗰日嘅董事局會議反映業界意見，但大家都知道當日會議主要係審議港交所年度業績，未必有好多時間傾其他事宜，加上舊年尾董事局都傾過加時，董事局態度堅強，經紀要「垂死掙扎」都好難喎！
講番個春茗，由於共有七個會多名代表，加上嘉賓一大籮，淨係安排上台就座、影相等已大傷腦筋。春茗主力搞手之一嘅證券學會會長李細燕，就話個台唔能夠向橫發展，惟有向前伸展，爭得幾吋位得幾吋。佢諗住個台會企七排人，每排13人，夾埋近100人。由於個台超大型，已買咗保險，以防萬一。