市場熱線：山水水泥突破阻力

恒指短線未升夠

尋日一次過殺咗48隻恒熊，恒熊重災區喺21,400至21,500點，所以既然恒指已上到二萬一，何不殺埋批熊？不過，大戶殺熊前先玩一輪心理戰，欠缺耐性就好易被震走，古勝今次會將止賺位由20,500點提高至20,900點附近，總之升到你信或者唔信為止。恒指下個目標雖係21,500點，亦係保力加通道頂部，但破完位冇理由升咁少，應可補埋個下跌裂口21,725點。

今次挾上冇乜特別因由，但魚生國前日加碼放水買債，月尾歐洲長期再融資操作（LTRO）又用1萬億歐元「浸」死你，所以QE推動資產價格嘅歷史可能重演。亦有人話中國領導人訪美例牌帶動股市，亦有人認為係兩會兼換屆，甚至話人行出聲支持歐債都成藉口，原因係幾虛無縹緲，但升跌都唔使太多解釋，破位後自然有人追貨。

A股計點數升得唔多，主要係銀行同保險呢類大隻佬升得少，但下跌股數唔夠100隻，二至九線股其實仲叻過港股。港股尋日有277隻股票下跌，但升勢已算幾全面，破完位之後，未升穿上次高位嘅則算落後，例如和黃（00013）、內銀等，至於祖國移動（00941）、地主股等則成功破位。

現估值已見吸引

習近平訪美代表團簽咗200億美元採購定單，仲應承開放交強險市場，交強險即係汽車意外保險，亦即係財險（02328）嘅強項，唔怪得之尋日財險升得唔夠1%。

水泥股唔知幾時開始做咗「啤打值」高股份，既然認為個市仲有得去，所以揀水泥股最簡單直接，古勝近期已有推介過中建材（03323）同中材（01893），今日再推介埋山水水泥（00691），尋日升穿7蚊之後消除雙頂疑慮。德銀上個禮拜出報告亦推介山水同潤泥（01313）。不過，德銀睇水泥行業復甦係出年，因為今年有好多不明朗因素。

QE除咗買地主股之外，資源股亦屬考慮之列，雖然依家係水泥淡季，水泥價格仍在下跌當中，但以水泥股現時估值，其實風險有限，好似山水一一年PE得6倍幾，一二年拉勻全年唔會差得好遠，假如中國嘅房地產或基建市場有起色，又或建材下鄉發大嚟搞嘅話，水泥股隨時有驚喜。

山水嘅基地喺山東同遼寧，未來新產能會主力投放喺山西同新疆，內陸城市發展快過沿海城市已係趨勢。就算假設水泥價格持續下跌，但水泥企業以增加產能補價格之不足。不過，水泥股一睇大市、二睇內房股、三睇內地放水，so far so good。