孖妹缸湖遊：情人節講心更講金

黃：金利豐證券研究部副經理黃智慧

送外國名牌股更吸引？

祺祺：聽日就係情人節喇，你今年會送咩禮物畀男朋友呀？

金利豐證券研究部副經理黃智慧	輝立証券研究分析員莫京燐	放大圖片

黃：我仲未諗到，依家好煩惱呀！我自己傾向鍾意親手整嘅禮物，但今年就無idea啦！

祺祺：我見身邊情侶會送名牌手袋、銀包，我啱啱check過價錢，一個Prada袋要成萬蚊架！諗諗吓，不如送兩手Prada股份（普拉達，01913）（約8,000元），幾年之後，回報分分鐘可以買幾個Prada袋添啦！

黃：都幾別出心裁喎！不過你要留意吓轉名手續，需要喺交易時段內進行一買一賣，當中更牽涉到稅項支出。

祺祺：其實我真係諗住送Prada股份畀男朋友。嘻嘻！

黃：哈哈，咁都畀你諗到！Prada係著名意大利品牌，靠住自身響噹噹嘅名堂，進軍新興市場。Prada早前公布舊年首三季業績，各地市場嘅收入都上升。喺品牌效應下，其毛利率更升至逾70%，成績表現可見一斑。另外，內地人嘅消費力日增，對奢侈品嘅需求愈見殷切，為Prada嘅業務增長帶嚟動力。儘管現時股價仍低過招股價，但後市可睇高一線，回報潛力將會不俗添！

祺祺： 咁喺香港上市嘅另一隻名牌股Coach（06388）呢？

黃：Coach嘅前景都不俗，舊年第二季收入亦按年增15%。不過，Coach係以預託形式上市，成交量一直偏低，成為唔少投資者嘅隱憂，所以我認為Prada嘅投資潛力較大。

祺祺：其實揀股票都好似揀情人架！我哋要事前了解清楚，先可以減低受傷損失嘅機會，唔怪之得啲人成日話要同股票談戀愛啦！

黃：無錯呀，就好似Prada咁，若然你自己本身鍾意呢個牌子，自然會多啲留意品牌發展方向，行街購物時又可得知銷售狀況喎，投資失利嘅可能性都低啲啦！不過，正如你話齋，股票投資如同拍拖一樣，需投入感情之餘亦唔可喪失理智。老土啲講句，當兩人關係出現問題，需冷靜分析前因後果，若果仍然挽救唔到，就要狠心分手，拖泥帶水只會令事情更糟！股票投資亦一樣，投資者要識得止蝕離場，否則會損失到焦頭爛額！

祺祺： 係呀！正如當年「八號仔」電訊盈科（00008）一役，佢個股價由高位滑落，但唔少散戶卻唔捨得止蝕，最終輸到貼地，真係「長痛不如短痛」喇！

莫：輝立証券研究分析員莫京燐

焦點由禮物轉向零售股

高妹：情人節你會送咩畀女朋友呀？

莫：我依家單身，所以今年唔使諗送咩禮物，不過之前通常係送奢侈品，如Gucci銀包、Tiffany頸鏈等等。

高妹：好大路喎，今年祺祺出盡心思諗咗個新主意。佢諗住送股份當情人節禮物，你覺得如何呀？

莫：呢個主意係幾得意呀，但要視乎對方係咩人喇！如果對方無留意開金融市場，可能唔太鍾意收到股份，反認為名牌手袋較實際可取呢。但換個角度睇，如果我收到呢份禮物，我會覺得okay，等同變相收到「錢」，仲有投資價值添！

高妹：金融界人士果然係鍾意講「金」（錢），咁你想收到邊隻股份呀？

莫：聽你講開金，不得不提周大福（01929）喇！儘管近期金價受到短期調整，但歐美各地不斷印銀紙，資金湧入市場之餘，亦增加咗黃金需求，將有利周大福的銷情。而且，周大福近年嚟不斷擴充內地銷售網絡，既以自營店推廣品牌，亦以特許經營模式嚟減低投資二三線城市嘅風險，再加上受惠於內地強大嘅消費力，過去數年嘅零售數據不斷攀升。縱使股價自去年上市後就一直潛水，但長遠仍有升值空間！

高妹：聽你咁講，雖則我依家同你一樣係單身，唔使買禮物畀情人，但買番一兩手周大福畀自己都好呀！

莫：除咗周大福外，米蘭站（01150）也係唔錯嘅選擇呀！米蘭站積極開拓內地業務，盈利增長樂觀。中國嘅消費力與日俱增，對奢侈品嘅需求愈嚟愈大，而米蘭站作為二手名牌手袋嘅交易平台，可對準內地中產市場，擴大公司銷售額。此外，海外奢侈品進入中國市場需繳納高額嘅關稅、增值稅及消費稅．以致商品價格遠高於國外水平，但米蘭站主要買賣二手袋，毋須繳交相關稅項，較有價格優勢，其股價將有不俗嘅升值潛力呢。

高妹：既然今年無談戀愛嘅對象，就同股票談住戀愛先啦！

莫：跟股票談戀愛未嘗不可，但切忌盲目呀！唔少港人對滙控（00005）都有情意結，即使股價疲弱，仍選擇繼續持有。須知道市場上仍有唔少優質股份，可帶來更多回報，何必「為一棵樹放棄整個森林」！

你認為本地樓市是否正現「小陽春」？

在財政預算案未有壓抑樓市「辣招」出籠、美國維持低息政策等利好因素下，近日二手交投勁升，創多周新高。你認為本地樓市是否正現「小陽春」？（08.02.2012）據今期《東方產經》網上民調，截至上周末晚上六時的結果顯示，42.5%表示「是」，57.5%表示「否」。

若有料報畀高妹同祺祺或有嘢問，可電郵money.biz@opg.com.hk

高妹、祺祺