市場熱線：中通服今年有運行

港股上周五失驚無神回吐超過200點，暫時仲係300點內嘅調整範圍，但如果真係兩萬一見頂，又回落到坊間普遍預測支持位20,500點嘅話，就變成圓頂派貨格局，呢個升浪亦變成只係反彈市，所以未來兩日走勢都幾緊要。

似高位派貨格局

之前個市就算有調整，但仍可「炒股唔炒市」大把嘢炒，不過，上周五除咗炒啲落後發霉股之外，好多當炒股已經大幅回吐，例如太陽能股、體育用品股等，保持強勢得家電股，但睇海爾（01169）由高位10.34元回落近1蚊收市，可見已升到好盡。

祖國嘅經濟數據都幾出人意表，繼CPI高預期0.4個百分點之後，一月進口竟然大跌15.3%，最出奇係一月新增貸款連7,500億人仔都唔到，同當初吹嘅1萬億人仔差得遠，加埋又死都唔肯減RRR，內銀股上周五成跌市元兇。傳聞發H股畀自己友嘅交行（03328）通告講到唔清唔楚，股價跌多兩錢重，埋單跌5%。

但聯想（00992）就升到你唔信，蘋果電腦股價亦直撲500美金大關，兩個雖然係競爭對手，但個餅咁大，無論你買蘋果、三星抑或聯想，就已經中長線跑贏大市。聯想除咗PC好賣之外，手機亦以高速增長，最近數碼通（00315）取消無限上網plan，即見客戶排長龍提前續約，股價逆市再升，可見客戶用慣高用量，好難返得轉頭。

電訊設備股一直受惠於網絡升級改造，但舊年跑贏大市之後，今年就跑輸成條街。不過係因股而異，好似京信（02342）同星辰（01155）業務相近，但走勢差天共地。舊年中興（00763）威、中通服（00552）沉，但今年則見逆轉；中通服搞掂咗供股之後，計落估值優勢就變成大落後。

中通服一一年PE唔夠9倍，歷史平均市盈率大約係12倍，息率有4厘幾，計埋佢每年盈利都有雙位數字增長，PEG唔夠1倍。中通服大股東係中電信（00728），中電信攞「哎瘋4S」傳到行一行，但股價反而要捱沽，皆因手機補貼筆數短期支出大過收入，但要搶高端客戶先要改善網絡質素，中電信同時要搞寬頻到戶兼提高速度，另方面要準備4G戰線，所以中通服未來唔憂生意。

另闢海外新財路

而中通服今次供股主要係話想開拓海外市場，如果能夠搵到另一條財路，就唔使話年年「穩定」增長咁悶。中通服連續7支陽燭，上個禮拜股價卒之突破過去三個幾月嚟喺3.25至3.75元嘅區間上落，氣勢肯定如虹。供股其實係大股東低價增持嘅手法之一，增持完之後經常見由蟲變龍。