絲絲講場：花旗200歲 MV又唱又跳
今年可謂銀行界嘅喜慶年，中銀香港（02388）發鈔慶祝中國銀行（03988）100周年、永明金融120周年、花旗亦喺尋日筵開八席春茗，招呼各位朋友，一齊慶祝集團嘅200歲生日。
一開席，就有花旗員工又唱又跳同你助興。講緊嘅係花旗特別為200歲壽辰而炮製嘅MV。五分鐘長嘅MV原來喺舊年八月已經開始籌備，短片集合咗來自五十個國家，近一千名員工嘅努力。見住班賓卡（banker）有啲打拍子，有啲展歌喉，絲絲驚覺原來銀行界嘅音樂人真係深藏不露。
問答遊戲獎金「一百萬」
午宴有「百萬富翁」問答遊戲做壓軸高潮，老友被抽中玩遊戲，憑住台上嘅「腦」力，同台下嘅「貼士」，老友終於奪得一百萬——越南幣，即係372蚊港幣，無所謂啦，當攞個意頭，發發新年財囉。
余絲韻