唔知大家喺年初四，有無見到中銀人壽執行總裁蔡中虎（CF）喺中環疾走呢？話說當日中銀香港（02388）總裁和廣北打算去中銀人壽派利是，點知和總貫徹高效率作風，臨時話可以早40分鐘到，搞到正喺中銀總行派利是嘅CF，要急急腳趕返近上環嘅中銀人壽總部，奈何中環嘅交通情況大家都知，最後都係慢過和總一步。
中銀香港貴為發鈔行，分支部門數都數唔晒，聽講和總唔係每個部門親自去派利是㗎，而係選擇性咁去，不過揀選標準就不得而知喇。絲絲忽發奇想，假如和總係根據表現而決定派利是地點，佢今次竟然早咗40分鐘到，唔通中銀人壽舊年表現好標青？
中銀人壽嘅表現就要等業績先知，不過佢哋代理嘅表現就認真唔錯，有75%嘅財務經理入咗百萬圓桌會（MDRT），當中更有71人成為Top Table成員（加入要求為MDRT的6倍）；大家唔好以為71人唔多，皆因一○年全港夾埋先得55人咋！
余絲韻