絲絲講場：Dr.歐陽鑽研5年「瘦」出個未來
幾經波折，必瘦站（01830）今日終於上市，創辦人兼主席及行政總裁歐陽江（Dr.歐陽）睇住自己個仔登上國際舞台梗係好開心，仲爆咗個小秘密畀絲絲知添。
狂吃零食變180磅肥仔
好多人都知藝人佘詩曼係佢哋嘅代言人，查實Dr.歐陽都好有資格做呢個位o架。
你咪睇佢依家弗到成個代言人咁嘅外形，原來以前佢係一個體重高達180磅嘅肥仔，於是的起心肝去學美容同體重學改善外形，仲用咗五年時間去鑽研同改良適合東方人嘅減肥機，為有需要嘅人服務。
咁為乜搞到自己咁肥啫？Dr.歐陽同絲絲講，嗰時做見習醫生壓力好大，於是食好多零食嚟減壓，加上又少做運動，真係日子有功，腰圍脹到34、35吋，所以佢都有試過唔同嘅方法減肥，慢慢地深入研究醫學美容同體重學。
佢仲話，其實東方人同西方人嘅體質好唔同，脂肪層係羊毛同羽絨嘅差別，所以由外國直接進口嘅減肥機唔太啱東方人，所以佢先去努力鑽研同改良機器引入公司。最後佢仲傳授咗幾招減肥方法，真係好啱絲絲呢啲成日坐嘅上班一族。
余絲韻