市場熱線：中材股份穩步上揚

落後分子繼續補漲

呢輪好淡之爭都押注喺希臘身上，好友相信最終可大步檻過攞到第二筆救濟金；但債仔咁嘅態度，無論債主同歐盟梗係唔like，到尾會否退出歐元區已係後話。講番內地一月CPI漲4.5%，搞到專家跌晒眼鏡，但PPI則略低於預期，變咗今個月減存備率（RRR）機會大降，日韓魚缸即時腳軟，但中港股市反而金槍不倒，冇好消息就小回，有好消息就大漲。但港匯升到高位已有兩個禮拜未有再進一步，尋日仲略為回軟。

RRR冇得減應該不利內銀同內房股，但尋日內銀回軟、內房則起動，同前日首套房按揭打折單消息慢咗一拍。內房一月賣樓成績全部交唔到功課，今年又話還款高峰期，如果要走貨，古勝會先走內房同航運股。「大賭場」呢兩日又搶番「細賭場」生意，新時代（00166）跌11%，但之前嘅落後分子都紛紛「補漲」，好似中國澱粉（03838）、佳華（00602）等。

古勝早兩日推介聯想（00992），雖然早預咗佢係高材生，但卻以為佢會保持獲利回吐傳統，點知公司季度成績表又好得交關，賺多超過5成，乜嘢上限都破晒，尋日股價升3.84%再創新高。

「高佬盛」發咗神經，將李寧（02331）目標價大幅調高到12.1元，又將安踏（02020）同361度（01361）目標價分別大降到4.4元和2.1元，做生意捧自己踩對家係慣用手法，但號稱獨立嘅大行分析就令人百思不得其解，尤其李寧近幾年生意完全唔係安踏嗰皮，如果根據「高佬盛」嘅目標價，豈非李寧嘅市值可重新爬過安踏頭？但大孖沙始終有影響力，尋日李寧大升14%，而安踏同361度就下跌。

水泥股呢排有唔少壞消息，除咗淡季令水泥價格繼續下跌之外，亦傳聞新環保標準令水泥廠成本大升，但呢排水泥股亦跟得住個市，而上個禮拜北京宣布成為建材下鄉試點，對於以北京為基地嘅中材股份（01893）則係好消息。

建材下鄉成催化劑

其實建材下鄉提出已超過一年，但具體點下鄉法仍有待公布，只知道水泥肯定有份，而今次將天子腳下嘅北京列入試點，相信好事近矣，所以水泥股無懼淡季亦有因由，今次揀中材除咗近水樓台之外，隻股呢排穩步上升，屬於升勢有餘未盡格局。而公司除咗生產水泥之外，另一主業係水泥設備，本地同海外水泥廠要擴大產能，公司亦從中受惠。

古勝