尋日話過大市闖關受阻，短期資金或將轉炒股仔，結果市況亦確實如是，睇番尋日升幅榜，就見到唔少仙股嘅身影。尋日仲有一隻逆市做好嘅股份吸引到詩詩留意，講嘅就係今年首個交易日介紹過嘅勵晶太平洋（00575）。
講起勵晶，表現真係唔爭氣，事關當日公司宣布派發特別中期股息每股0.03元，相對當時0.26元嘅股價，息率達11.5厘，本諗住財息兼收，點知炒得一日就打回原形，之後仲喺上月中發盈警，預期業績將由盈轉虧，股價即時大插插，最低曾見0.203元，真係賺咗息都補唔番。
其實集團以控股投資為主要業務，業績跟隨市況波動難免，反而盈警通告中，集團指截至去年底其未經審核每股資產淨值達0.443元，相對股價存在大幅溢價，故擬就回購已發行股本最多額外10%尋求股東批准。睇番其股價連日由低位回升，尋日再升逾3%，收0.231元，但仍較NAV折讓近半，有回購支持，即管賭多一鋪，博其返回0.26元水平，而支持位在0.22元。