市場熱線：聯想候回吐上車

呢個禮拜個市會偏靜，花旗冇乜重要數據公布，大公司成績表又出得七七八八，尋晚輪到可樂同米老鼠；祖國聽日公布嘅CPI亦唔慌有驚喜，來來去去繼續睇住希臘台戲，偏偏你急佢唔急。大賭場冚旗，細賭場就好熱鬧，尋日繼續炒啲細價股，而水泥股則跟住A股跌，水泥業依家係淡季，跌價亦算正常。

RQFII反應唔多理想

A股尋日另一類勁跌嘅係券商股，中信証券（06030）一月份按月賺少95%，有4間上市公司仲要見紅。乜A股一月唔係翻生o架咩？但今年農曆新年喺一月，而最緊要係IPO數目大減。券商股舊年成日炒RQFII、港股ETF概念，但RQFII正一係雷聲大、雨點小，好多到依家都未足額。散戶雖然不乏好息之徒，但唔係傻仔，收到管理費同認購費咁貴，不如自己存人仔好過。

唔知炒乜就不妨睇大行報告做盲公竹，尋日思捷（00330）、鐵鈦（00893）、神州數碼（00861）、聯想（00992）同ASM太平洋（00522）都有大行唱好，除咗聯想之外，其他都被唱起。大行出報告當然唔會有平貨畀你買，思捷同鐵鈦已5連升，但仍算係醜股大翻身，瑞銀同德銀分別叫人最低潮買入。

花旗嘅科技股升到開巷，創咗二○○○年泡沫爆破以來新高，Facebook又話上市，但香港嘅科網股得聯想爭氣，神數啱啱發力，而金蝶（00268）唔知有乜暗病。聯想聽日會派第三季度成績表，幾間行做賽前預測，冇乜邊間睇淡，只有野村認為已到價，大摩上調目標價到7.2元，而巴克萊相信聯想會同比賺多四成，會再次令市場有驚喜，但同時又話根據過往經驗，聯想會喺業績前上升，但派完成績表後有獲利回吐。

爬HP頭指日可待

其實大家都睇住聯想幾時可以榮升PC一哥，依家聯想市佔率係14%，已追近惠普（HP）嘅16.3%。講到積極性，兩間公司冇得比，聯想喺內地同新興市場增長理想，平板電腦雖然逐步蠶食個餅，但聯想似乎未有受到大影響，「哎pad」嘅壟斷地位亦開始動搖，因為計價錢同性能，樂pad絕對唔輸蝕，有望收窄依家喺內地1：4之比。

聯想睇走勢圖已經贏成條街，無論個市升抑或跌，隻股都一路反覆上升。古勝唔排除喺派完成績表之後，聯想有機會獲利回吐，但趁回吐值得長線買入，只要閣下相信聯想嘅增長故事，爬HP頭亦指日可待。聯想一一/一二年度預測PE約18倍，以佢增長率來講一啲都唔貴。