內地官方公布一月份PMI上升至50.5，勝預期，但尋日炒起嘅卻係航運股。其實歐美經濟前景仍未明，始終係航運股心腹大患，經尋日大升後，今年以來累積反彈幅度亦唔算少，自問追貨信心唔大。反而製造業向好，對生產設備需求亦有直接推動作用，重慶機電（02722）尋日逆市升1.9%，報1.59元，可留意冷敲價值。
集團主營業務分別為商用車輛零部件、電力設備、通用機械及數據機床，產品廣泛應用於汽車、工業、能源及基建等範疇，故業務表現比從事單一業務嘅公司來得穩定，去年上半年的盈利及營業額分別為3.87億元（人民幣‧下同）及51.2億元，增長12%及22.4%。不過估值亦未見突出，現價往績市盈率得7倍左右。
詩詩舊年十二月頭亦介紹過重慶機電，當時股價1.3港元左右，之後股價反覆向上，現時平均線排列向好，昨日上試舊年十月高位1.67港元未果後回調，一旦成功突破，可上望1.8港元水平，支持位1.4港元。
詩詩