絲絲講場：中電信２億撐伙記創業
內地三大電訊商競爭日趨白熱化，營運商為咗維持優勢，喺服務創新上，落咗唔少功夫。
中國電信（00728）據說正籌組一項員工創業計劃，斥資約兩億元（人民幣‧下同），鼓勵員工開展同電訊相關嘅科技創業計劃！中電信董事長王曉初有呢個構想，唔知係唔係受到Donald Trump嘅電視節目《飛黃騰達》啟發呢？
兩年內保留職位
據講，呢項「員工創業計劃」嘅實行細節仲未完成，但大框架涉及範疇將以移動互聯網、雲計算、電子商務等領域為主。
更加有消息話，中電信考慮中嘅方案，涉資大約二億元，創業團隊最少要由三名員工組成，每個團隊首期可獲嘅創業獎勵金為五至十萬元，創業期為兩年，期內中電信會為創業人員保留職位，而創辦嘅業務範圍當然係要同電訊業務相關。
絲絲聽到中電信呢個「員工創業計劃」，即刻聯想到Donald Trump嘅電視節目《飛黃騰達》嘅橋段，如果呢個計劃落實開展，中電信未知會唔會考慮都拍低創業過程，並包裝成電視節目，畀用戶以３Ｇ手機分享呢！