財政預算案除咗講住宅及商業樓宇供應外，絲絲留意到關於吸引更多數據中心落戶香港嘅章節。唔講唔知，原來選址大有學問，其中一個條件係唔可以近金舖，何解？怕畀AK47（步槍）射中。政府提出好多優惠，嚟吸引更多數據中心落戶香港，例如豁免一啲申請、營運費用，補地價又會有優惠，仲特登預留咗土地，專係做數據中心。
絲絲唔係資訊科技專才，所以就請教政府發言人點解要特登預留土地去做。佢話興建數據中心係有一系列嘅嚴格要求，好似現有大廈嘅樓層要有足夠嘅承重力去擺放電腦伺服器，以及一系列嘅配套機器，好似大型冷氣系統、防火設施等。仲要電力供應穩定，所處區域唔可以有水災等自然災害。
發言人仲話，數據中心可以接近民居，但就唔可以鄰近金舖。點解？佢半講笑咁話同同事研究過，因為怕會有打劫，有人會揸住AK47（步槍）掃射，流彈打中伺服器就分分鐘會喪失寶貴數據。呢個要求，絲絲真係未聽過，但會唔會太杞人憂天呢？以此推論，數據中心鄰近銀行，都應該會有同樣危機噃！