內地石油業要交暴利稅，內地銀行亦都係出晒名係暴利行業，但政府就冇干預，搞到班學者睇唔過眼，要求銀行以不對稱嘅方式，調高銀行予小存戶嘅息率。
民生銀行（01988）行長洪崎早前都好坦白咁話，「行業利潤太高、都不好意思公布」，連自己人都咁講，暴利情況嘅嚴重性真係不容忽視。中國國際經濟交流中心副秘書陳永傑炮轟，內銀利潤之高，已經超越煙草石油呢類暴利行業，中央應該從根本層面改變銀行業嘅暴利現象。
有統計顯示，內銀去年總盈利超過1萬億元（人民幣‧下同），反映企業生產力嘅員工人均利潤更達50萬元，人均利潤較製造業高出十倍之多，其「暴利」程度甚至超過煙草石油行業。
陳永傑話，內銀之所以能賺取暴利，係由於內地達3%以上嘅存貸息差，遠較西方國家為高。點解決？佢提議人行應該用不對稱嘅方式，調高銀行給予小存戶嘅息率，甚至向銀行業加收暴利稅。