絲絲講場：宋鴻兵出Game帶你線上打幣戰
聽講內地炙手可熱、憑一系列《貨幣戰爭》著作而聲名大噪嘅經濟學者宋鴻兵，打算推出同名嘅Online Game，等讀者可以變身玩家參與遊戲。原來呢個消息係真o架，宋大師仲話畀絲絲聽，「最快四、五月就會推出」添。
畀人封咗做「財經陰謀大師」嘅宋鴻兵，懶理人哋點嗌佢，佢依家忙住做《貨幣戰爭》嘅電子遊戲測試，一路落嚟幾順利。佢話當決定要推出遊戲，就親自挑選咗一個團隊進行遊戲軟件開發，依家進入咗面市前嘅測試階段。
最快四月有得玩
一切順利嘅話，個Online Game最快四、五月會率先喺內地推出，然後陸續會喺台灣、香港、日本同韓國等亞洲地區登場。宋鴻兵話遊戲嘅第一集，係以歐洲拿破崙戰爭做背景，第二集就以美國崛起為主軸，到第三、第四集仲有亞洲金融風暴同歐債危機，全部係以佢套書嘅背景做遊戲骨幹。
大家睇書要靠想像，而網上遊戲就索性等讀者自己參與貨幣戰爭。玩家可以同時兼演多個角色，參戰又好、經營都好，仲可以扮埋銀行家，總之就係要「達成任務」。
宋鴻兵推出呢套遊戲，主旨係畀玩家了解金融、政治喺戰爭裏面嘅相互關係，仲可以由歷史事件中領會自己點樣左右戰爭。呢個遊戲唔係打怪獸，如果覺得自己嘅財經知識水平仲可以嘅話，不妨挑戰吓。