市場熱線：華創低吸有着數

中國PMI連續兩個月處於盛衰分界線樓上，計埋農曆新年因素其實仲勁；之前又話驚過完年工廠有執笠潮，又驚經濟硬着陸，又驚保唔到八，結果證明阿爺略為放水即有起色。不過，A股毫無反應，收市仲要下跌逾1%，有分析話既然數據咁勁，即係唔使減存備率。

之但係，航運股對PMI就好激，東方海外（00316）話加運費，中海集運（02866）勁升15%，但睇番「菠蘿指數」跌足1個月，跌到唔夠700點，古勝都未見過咁長跌浪；而PMI裏面嘅出口定單指數其實跌咗1.7個百分點。航運股平就話買啫，依家真係追唔過。

「哎幫」吸引力已降

至於個「畢直」，次次未公布就已內容通晒天，個市自然冇反應，樓市政策亦係不變應萬變。今次擺明益中產，要年薪90萬樓上先可以攞盡萬二蚊退稅額。政府再推「哎幫」，但同時預測今年通脹得3.5%，對好多人來講，有三厘半利息好過做定期多多聲，但放喺內地做人仔1年定存亦有三厘半息，買領匯（00823）都多過4厘息，今次「哎幫」會較多人認購但吸引力降低。至於增加基建投資年年講到麻木，中國建築（03311）仍要微跌。

新時代能源（00166）獲彤叔增持17球，股價即飛升34%，聽管理層話隻股計石油存量每股值8蚊樓上，但睇往績，彤叔當年亦曾以7蚊樓上增持蒙能（00276），依家股價跌咗9成。原本超強勢嘅盈德（02168）有股東批舊股，尋日股價亦跌8.4%。自從六福（00590）批股之後，孖屐趁高抽水事件唔算多，但遲吓又有批龍年新血IPO，睇落暫時冇乜邊隻起眼。

個市要繼續升就要搵新血接力，尋日華創（00291）升2.4%，隻股已有兩個月時間喺26.5至28元之間窄幅上落，勝在風險唔高；華創舊年頭三季成績表只係油麻地，全年業績亦冇乜期望，但主要係少咗特殊收益同埋要畀多咗乜稅物稅，核心業務仍係正常發展，買內需股唔少得佢一份，皆因超市同啤酒業務唔多受經濟環境影響。

獲多間大行唱好

華創上個月微跌不足1%，但已係第五大表現最差藍籌，原因係股民捨棄防守性股份，但近日防守股有所反彈，相信係部分投資者認為個市已升到差唔多。

華創舊年成績表已見底，今年通脹回落，有利超市業績表現，啤酒亦有機會加價，高盛、巴克萊同星展今年都叫人買華創。另一期待消息係公司買嘢，其實華創每年都有一、兩單大型收購，而每次有收購都會刺激起股價，至於超市同啤酒業務更係不斷壯大，想買隻長線增長又穩陣嘅股，華創肯定係其中一隻。

古勝