堅持努力，新一年繼續出發！近排仍然開會開到冇晒時間，不過用電腦儀器時都會睇吓邊間公司出品，睇吓電腦產品市場銷情點樣！依家電腦已經成為生活嘅必需品，除咗手機、家電，另一樣家中不可或缺嘅，就係一部電腦。小朋友做功課要上網，申請乜申請物都要上網，上網已經成為我哋生活嘅一部分。喺電腦呢個競爭咁激烈嘅市場，能夠躋入龍頭地位嘅公司，更加不可小覷！
聯想集團（00992）主要業務係分銷同開發軟件、提供系統服務、開發資訊科技技術等等，近年平板電腦又不斷攻入市場，令競爭極度激烈。雖然競爭激烈，不過集團有優質嘅管理層，已連續八個季度優於全球個人電腦市場嘅平均表現。銷量均衡增長，令集團連續第六個季度成為主要個人電腦廠商入面增長最快嘅公司，一直保持住領導嘅地位。
集團嘅手機業務表現亦理想，傳統手機業務增長強勁，銷量上升40.3%。大家如果熟悉內地市場，會知聯想喺一○年五月，喺中國推出咗一款智能手機，叫做「樂Phone」，手機行業自己做嘅市場調查顯示，集團係中國第一大嘅本地移動手機商。另外，集團又喺一二年三月推出首部平板電腦「樂Pad」，想成為中國嘅蘋果咁款！
睇番數據，集團一一年盈利增長111.8%，市盈率25.3倍，息率1.36厘。繼續追蹤、出發！