被控偽造及使用虛假龔如心○六年遺囑嘅陳振聰，自從打官司以來就諸事不順，連佢間上市公司宏霸數碼（00802），都成日被股東否決動議，尋日仲發埋盈警，話舊年業績會虧損大增，仲話會尋求其他集資安排，小股東要小心嘞！
絲絲仲記得宏霸早在一○年動議1拆20，就去到無雷公咁遠嘅馬來西亞Petaling Jaya開股東會，結果都係被否決，上星期六同樣喺馬拉開會，動議授權公司自行配發20%股份集資，結果41.19%贊成對58.81%反對而被否決。
宏霸講明，將尋求其他集資安排作擴展融資及償還貸款，尋晚仲出埋盈警，話競爭激烈令售價下跌同成本上升，公司舊年下半年要減價賣存貨，又要為貿易應收款項帳面值進一步大額減值撥備，相信淨虧損大增。宏霸一○年純利大倒退到七千二百幾萬元，舊年上半年已公布勁蝕5.7億元，都咪話唔恐怖。舊年底時宏霸有現金約2,400萬元、銀行借貸約8,300萬元。
對於宏霸走到馬拉開會，絲絲查過《上市規則》係無限制上市公司開股東會地點，例如中盈（00766）響○七年更誇張到響中緬邊界嘅雲南潞西市開會。
賓卡老友同絲絲講，其實家陣陳振聰單官司咁唔明朗，公司有咩動議，相信小股東都會投反對票，揸成13.31%嘅最大單一股東龔如心遺產基金，大把條件同公司「講數」，一個唔覺意投反對票，就算揸10.85%嘅陳振聰，都好難想點就點。
余絲韻