中證監主席郭樹清喺上個月初，曾力勸低收入同攞緊退休金嘅人唔好炒股，炒股嘅風險唔細，郭主席都係苦口婆心啫，但估唔到竟然有位老股民發公開信話，唔炒股票係「等死」。
發信嘅股民今年59歲，喺股市已經打滾咗近廿年。佢形容自己本住「小心使得萬年船」嘅諗法，除咗邊學邊炒，仲會喺唔同嘅時段分散投資。而廿年嚟仲有一啲收穫，只係喺二級市場嘅交易就冇乜成績。
呢位股民已經下崗15年，講得好聽就係「自由職業者」，但近來冇晒發展空間，買基金同認購新股都好難贏錢。去年冇收入，太太就勸佢聽郭主席話，以後就靠攞退休金生活。
股民承認炒股係「找死」，但喺物價、樓價高漲嘅今日，唔炒股係「等死」。因為唔理財、唔炒股，只靠退休金過活，係冇尊嚴同幸福可言嘅。佢同廣大股民都對郭主席有好大期望，最好將股市搞得「火起來」。佢又氹郭樹清抽時間去證券營業部探望股民，聽吓佢哋嘅心聲。真係估唔到郭樹清上任兩個幾月，畀佢嘅公開信仲係咁激嘅！
據呢位股民嘅講法，真係炒唔炒股都死，唔怪之得舊年A股新開戶人數創15年新低，得1,079.51萬戶，比之前一年足足少咗27%，即係414萬戶。
余絲韻