孖妹缸湖遊：龍年股市盼高飛

股壇開心果

笑容滿面嘅嬌姐炒股逾二十年，現於荃灣穎翔證券「返工」，曾經歷無數股海風浪，喺○七年賺過幾十萬，及後喺○八年又輸番幾十萬，身家大起大落！不過，樂觀嘅佢笑言「天跌落嚟當被冚」，亦因此而得到「股壇開心果」嘅稱號。

「我以前炒股都會憑感覺，殊不知○八年個市一冧落嚟，手頭上嘅股份大多跌到『渣都無』。我嗰時仲諗住等到佢哋返家鄉嘅一日，點知最後都係要損手離場。但經一事便會長一智，我依家每次投資都會設止蝕位，如果不幸過咗呢個價位，即使忍痛都要離場！

陳生

張生

做足功課 嚴守止蝕

「舊年個市立立亂，大部分投資者都係輸錢離場，個個都話『輸少當贏』。我自從經過金融海嘯一役後，現在唔會隨便入市。我會事先做足功課，留意該股份嘅市盈率同埋成交量，再嚴守止賺及止蝕位。因此，我喺舊年嘅投資回報總算打番個和，力保不失。

「港股仍受歐債危機拖累，前景看似陰霾滿布，但我認為龍年大市表現將會做好。中國兩會會議將於三月舉行，可望推出相關刺激經濟措施，屆時恒指有機會升至二萬點，所以我現在會預留彈藥，到咗三月就會重錘出擊。」

嬌姐

炒股年資：20年

兔年投資回報：不過不失

龍年投資策略：小心防守儲彈藥，待股市尋底過後重錘出擊

荃灣股神

陳生縱橫股壇四十多年，眼光一向獨到，曾低買高賣港交所（00388），賺逾二百萬，因而被譽為「荃灣股神」。每天都會到荃灣嘅新鴻基証券炒股，目的為保持頭腦清醒，藉分析市況以訓練思維。

背靠祖國 差極有限

「我哋炒股最重要係克服自己嘅弱點，唔少散戶既貪心又怕死，缺乏耐性，到頭來得個『吉』。其實，我炒股好少會設止賺及止蝕位，因為我係睇發展潛力，而唔係短線波幅。舊年個個都大嘆股市難玩，但我就睇出濠賭股嘅升值潛力。澳門賭場不乏客源，又得到當地政府支持，前景真係無可限量，所以我喺舊年透過炒濠賭股賺逾一倍回報。

「市場上唔少專家都睇淡今年大市表現。然而，香港經濟無疑係受歐美市場影響，但我哋背靠祖國，所以個市差極有限。金融海嘯至今，各地股市都反覆不定，連基金經理、債王，甚至乎股神都要輸錢。可見呢幾年嘅股市均相當難玩，而小股民更係深受其害。不過，龍年嘅市況應會由陰轉晴。哈哈，生肖圖像全都顯示出龍嘅姿勢係向上游，象徵活龍活現同萬事大吉，所以今年個市應會節節上升！

「此外，今年中央會繼續推動內需，保持內地經濟增長，務求實現『保八』，可利好A股市場同港股表現，東岳集團（00189）、中聯重科（01157）、安徽海螺（00914）、國壽（02628）等股份都係行業龍頭，可睇高一線，且受到中央政策所扶持，發展前景相當理想，所以我喺龍年會集中投資呢類股份呀！」

陳生

炒股經驗：44年

兔年投資回報：逾1倍

龍年投資策略：集中揀股，長線投資

股壇老兵

張生曾經係術數師，專門研究風水命理，依家係退休人士，游走於大圍嘅耀才證券及紅磡嘅時富證券，人稱「股壇老兵」，寓意喺股市戰場上打不死。他表示股海風波裏，既有「得」亦有「失」，心態上要放得開先可屹立股壇上。佢雖懂玄學術數，但從不以此角度研究市況，佢坦言風水術數乃天命分析，唔能夠用於預測股市走勢。對於龍年大市表現，佢都係用番自己十五年嘅炒股經驗作侃侃而談。

「我炒咗股咁耐，見慣股壇風雨，曾贏取逾十八倍回報，亦曾試過輸到損手爛腳。坦白講，我哋之所以炒股，無非都係貪心想賺多啲，否則我放啲錢喺銀行啦。不過，無疑小股民係要貪，但又唔可以太貪。哈哈，好似好矛盾咁，但其實係股市上嘅老生常談，只要識得止蝕及止賺，便可進退有據。

「上年受到歐債危機影響，港股反覆波動，唔少大鱷從中賺取差價，散戶大多無啖好食，叫苦連天。然而，股市喺上年下挫後，依家大戶持有市場上大部分股份。今年佢哋應該會推高個市，炒番熱個投資氣氛，意圖吸引散戶追貨，做好大市表現。因此，恒指喺龍年會拾級而上呀！

吼金屬股 首選中鋁

「我今年尤其睇好金屬股，儘管市況波動，但市場對金屬產品仍然有一定需求，而中國鋁業（02600）更係我喺龍年嘅心水股份。呢隻股份喺舊年大幅下挫，今年將會受惠於內地對鋁需求嘅增長，加上又係行內龍頭喎，實有反彈之勢！」

張生

炒股年資：15年

兔年投資回報：+30%

龍年投資策略：對股票選擇要取之有道，於冒險中求穩健

你會認購RQFII基金嗎？

15隻獲批RQFII（人民幣境外合格機構投資者）的基金陸續登場。當中，海通及匯添富已於周三（11/1）率先公開發售主要投資內地債市的RQFII基金，入場費1萬元人民幣。你會認購RQFII基金嗎？據今期《東方產經》網上民調，截至上周末晚上六時的結果顯示，24.1%表示「會」，75.9%表示「不會」。