市場熱線：中海化伺機突破

連歐債危機都可以暫時過骨，花旗嘅經濟數據稍低過預期亦可以當睇唔到，所以股民可以放心買貨，但「相反理論」話大戶亦會放心沽貨。不過，散戶嘅信心先啱啱返嚟，恒指上個禮拜升600點只係起步。

內地股市重拾弱勢

A股上個禮拜兩升、兩牛皮、一跌，但港股跟升唔跟跌，證明仲算強勢。不過，A股真係爛泥扶唔上壁，溫總打完氣都係升得兩日，上周五深圳創業板更暴跌超過6%，新浪網嘅股評非常生鬼：「儘管權重大哥們非常努力，但小弟們見勢不妙，腳底抹油先溜。」深滬加埋上升股份得百零隻，但下跌股份超過2,000隻。

香港則唔理大細股，主要炒落後，但仍有唔少實力股被洗倉，百麗（01880）弱雞之謎終於揭曉，零售股有春江鴨在所難免，公司喺內地有萬幾間零售店，好唔好賣、有冇減價其實股價會有啟示，但奇在同係賣鞋嘅達芙妮（00210）上季同店增長竟然有26%。但總之孖屐已經對零售股有戒心，百盛（03368）上周五亦跌5.5%，以前愈高檔愈受追捧，但依家就避之則吉，有間名牌時裝代理商彩虹集團準備上市，品牌包括Hugo Boss、Armani等，同類股係利邦（00891），但睇利邦呢排走勢，定價好難進取。

博內房股要揀龍頭

內房股間唔中炒一炒，有消息話4大地主豪掟100億人仔買地，佢哋咁大招牌唔驚冇人借錢，而且佢哋策略一向係貨如輪轉。內房股兩極化情況愈來愈明顯，龍頭股猛執平地，相反手緊嘅公司要賣地，所以未來要買都揀龍頭股。

聯想（00992）升穿6蚊，科技公司報告話其PC市佔率進一步逼近惠普，一方積極進取，一方無心戀戰，聯想做PC一哥係遲早嘅事。不過，第四季PC市場比第三季下跌，即係個餅其實細咗，聯想始終要諗吓點樣喺平板電腦市場殺出一條血路。

古勝上個禮拜推介過中化肥（00297），今日再揀埋另一隻化肥股中海石化（03983）同大家分享。相比起中化肥大上大落，中海化走勢簡直同大市脫節，唔知嘅話仲以為佢係一隻公用股，呢排亦係窄幅上落，其實唔貪心嘅股友揀呢類股炒上落就最啱。

窄幅上落嘅股可以係散貨、可以係收貨，好多時係視乎閣下嘅主觀意願，當然最緊要係睇基本因素。中海化嘅兩大主要產品係尿素同甲醇，兩樣都可以用天然氣或者煤炭生產，中海化嘅新項目都傾向用較低成本嘅煤炭生產，煤炭價格近期下跌有助減輕成本。

尿素同甲醇價格舊年下半年都幾低迷，但隨住過完年春耕臨近，尿素價格應可回升，而甲醇價格亦因伊朗石油禁運同封鎖海峽消息而有所反彈。不過，中海化主要靠增產去提升盈利，所以一一年成績表應該仲算唔錯。

中海化呢兩個幾月明顯見5.75元附近係一個好大嘅支持位，以炒上落來講亦係買貨時候，阻力位係6.5元，上升空間大過下跌空間好多，至於有冇大突破就要睇三月份全年成績表。

古勝