絲絲自小就聽講「讀多啲書先有前途」，不過《福布斯》美國富豪榜就證明凡事都有例外嘅。喺400強當中，有63位企業家原來冇大學學位證書，比例有成15%咁多。
《富豪們的學歷》呢本書當中，訪問咗facebook嘅前總裁帕克（Sean Parker）、創辦人之一莫斯科維茨（Dustin Moskovitz） 、金銀島飯店老闆魯芬（Phil Ruffin）同埋美容企業老闆狄莊寶（John Paul DeJoria）等四位億萬富豪，佢哋都認為大學學位並唔係獲得巨額財富嘅唯一條件。
fb風靡全球，亦都造就咗多位億萬富豪。莫斯科維茨同帕克依家都認為隨住網絡世界發達，正式大學教育變得愈來愈唔重要，因為大家都可以喺Google度學到你想學到嘅嘢，而且大學又可以之後隨時返去，頂多係班同學仔唔同咗，但呢樣嘢同所得到嘅機遇就冇得相提並論咁話。若果莫斯科維茨同朱克伯格當年冇退學嘅話，依家都唔會有fb喇。
原本都係「打工仔」嘅魯芬，畀年輕人嘅建議係：「辭職，唔好同人打工，因為打工永遠賺唔到錢」，可能「工字唔出頭」就係咁解啦。不過，絲絲就覺得，成功始終係要靠努力同機遇，而學歷就係一張入場券，所以大家仍然都係畀心機讀書吧！