絲絲講場：經紀遊行 鬧爆無啖好食
逾百名經紀、投資者同餐飲業人士，尋日響應證券及期貨從業員工會嘅號召，浩浩蕩蕩遊行到港交所（00388）抗議三月實施第二階段港股加時，又即場「打爛飯碗」，比喻行業生存空間受威脅，飯碗不保。大會話參與人數有1,000至1,100人，警方就估計約有400人。在場所見，唔少參與人士情緒高昂，高舉「小加你好，再加離譜」、「打壓細行，迫入死巷」、「佳理變歪理，有佢就冇理」、「雪上加霜，C組好傷」同「餐飲業，慘慘慘」等橫額，沿途並高叫口號。
「沈大師」撐場兼吹雞
股壇「大姐大」蔡陳葆心更唔理自己腳痛，天寒地凍走過嚟「撐場」，佢批評當局不理民意、一意孤行，依家有些從業員「連28元最低工資都不如」！佢同佢位公子證券商協會主席蔡思聰都有嚟，兩人都以個人名義支持今次遊行。
嚟「撐場」仲有沈振盈，「大師」今次有份「吹雞」，呼籲公司嘅前線員工同客戶嚟支持遊行。佢話加時根本冇效，兼且擾民，對港交所「意見接受，態度照舊」好不滿。
港交所見遊行隊伍聲勢浩大，亦不敢掉以輕心，主席夏佳理、行政總裁李小加、營運總裁葛卓豪、交易科主管戴志堅四人親自出嚟接信，雖然被在場人士大喝倒彩，仍非常淡定。
李小加企硬 照改革
夏佳理話已收到從員業嘅訴求，佢認為證券行老闆應該要喺午休時間上給予員工多啲空間，令工作更容易處理，又話香港要同國際接軌，否則會輸畀其他競爭者。李小加更加話，改革都係「先苦後甜」，知道未必即時有利益，但就要受苦先。業界可以唔高興，但改革唔應該停落嚟，香港不進則退，必須向前走。
換句話講，港交所「企硬」加時會如期落實。證券及期貨專業總會會長王國安就批評，港交所將個「波」推落證券行老闆上，現時係市場制度傾斜、不公，令到投資者卻步，佢誓言會抗爭到底。
余絲韻