港股回吐守穩萬九點關，似乎「餓」咗好耐嘅好友唔肯就咁罷休！趁住指數整固，炒家轉移視線至細價股身上，久未有炒味嘅太陽能股成功翻炒，保利協鑫（03800）成交額多達14.3億元，收升13.7%。有智慧不如趁勢，一於跟風炒股仔走轉快！
觸發太陽能板塊異軍突起，主要係有外電報道，上月德國提高對太陽能裝置量嘅需求。事實上，太陽能股經已衰咗大半年，藉行業利好消息來個大反撲並唔出奇，反正如今市底有改善，各位鑊鏟之友都諗住炒番轉賺錢過肥年。
鉑陽太陽能（00566）尋日一度踼上0.32元，收市報0.29元，升1.75%，翻查紀錄，約七成交投在0.3元或樓上成交。股價正醞釀黃金交叉利好訊號，若成交維持，話唔定等班炒家上足子彈後，會再開車衝0.32元，回吐宜守0.275元。
古晨