絲絲講場：淘寶商城變「天貓」有段古
阿里集團旗下最「火紅」嘅，一定係阿里巴巴（01688）同淘寶網，為咗進一步拓展電貿商機，阿里集團舊年六月，索性將淘寶商城（tmall.com）獨立營運，事隔半年淘寶商城更改名換姓，新名係「天貓」，改呢個名原來係拜馬雲所賜。
凸顯與淘寶網不同
以B2C作定位嘅淘寶商城創立至今，好多人仍搞唔清楚，佢同C2C拍賣網站淘寶網嘅分別，所以唔使多講，大家都估到今次改名就係要強調兩者之間嘅不同定位。點解改呢個名？阿里集團嘅首席市場官王帥話，有次佢正為改名嘅事頭痕，老闆馬雲忽然打電話畀佢，仲問「貓怎麼樣？」
王帥雖然無具體講，點解馬雲突然會想到tmall要以貓為名，不過佢就話貓被認為難養又奄尖、時尚又性感嘅特性，正好體現了tmall講求時尚、潮流、品質、具吸引力嘅定位，充分體現了其與淘寶網作為拍賣網站嘅根本分別，而天貓亦正正係tmall嘅諧音。
余絲韻