絲絲講場：大款送禮至like 茅台排第五
胡潤榜嘅對象係內地富豪，經常會訪問佢地點起家，亦好清楚佢地嘅喜好，胡潤研究院尋日就公布《2012胡潤十大最受富豪青睞的送禮品牌》，張禮品名單大部分係國際名牌，唯一例外係茅台，仲要排名第五，唔怪之得茅台舊年嘅銷售咁厲害啦。
首選外國奢侈品牌
據胡潤統計嘅全球十大最值錢奢侈品牌入面，茅台就以120億美元的品牌價值，已經成為全球第四大最值錢奢侈品牌，不過，論受內地富豪嘅鍾情度，嚟自外國嘅奢侈品牌依然係首選。喺今次十大富豪最愛青睞排名入面，排第一到第四嘅分別係，LV、卡地亞（Cartier）、愛馬仕（Hermès）及香奈兒（Chanel），而LV就以205億美元嘅品牌價值成為全球最值錢嘅奢侈品牌。
胡潤百富創始人兼首席調查員胡潤話，內地富豪最鍾意就係送有牌子嘅禮物畀人，特別係喺春節嘅時候，佢哋送禮嘅價值仲要明顯比歐美要高，唔怪得絲絲次次經過香港嘅名店門口總係大排長龍啦！
身家愈多出差愈頻
呢個報告仲有啲有趣數據，從旅行出差頻率嚟睇，億萬富豪平均每月出差12天，比千萬富豪多4天，每月出差20天以上嘅佔四分一，平均每年出國4次，由於最近大環境不太樂觀，富豪嘅平均年消費比去年降低9%。
余絲韻