香港人知道集體回憶嘅重要性，交易所大堂都屬呢類，特別係一班有番咁上下資歷嘅經紀，每次講起交易大堂，都好懷念當年幾咁熱鬧，人情味幾咁濃厚，絲絲問起董偉、蔡陳葆心兩位前輩，兩人異口同聲話，一定要保留呢個特色。
交易大堂愈縮愈細，都係電子科技發達嘅後果。曾經係一代船王包玉剛、董浩雲及邵逸夫「御用經紀」，見證香港股壇變遷嘅資深經紀董偉，慨嘆交易大堂面目全非，當年嘅「氣氛」、「人味」已不復見，希望港交所喺追趕潮流嘅同時，亦應顧及歷史價值。
佢舉咗美國為例子，佢地嘅交易速度夠晒快，但交易大堂仲係好活躍，證明交易大堂唔係單純進行交易，喺形象上代表住整個城市；故建議港交所，應考慮適當地減收費以及保留有香港特色嘅交易時間，令更多經紀行願意派駐經紀到交易大堂。
香港證券商協會副主席及永遠名譽會長蔡陳葆心，都話交易大堂嘅存在係一項形象工程，外賓來訪時，有一個代表香港金融市場嘅參觀場地，新股上市也有舉行儀式嘅地點。
余絲韻