市場熱線：中遠短線博反彈

弱勢股忽然發力

今日有幾單嘢，歐洲有央行議息同鬥牛國賣債，祖國公布CPI但已淪為配角。歐洲央行未必減息但有機會加碼買債，至於鬥牛國只係賣短債應該冇乜問題；聽日到意粉國賣債同細摩派成績表，但孖屐氣氛好就冇乜好驚。

恒指尋日升147點，收報19,151點，成交金額533億元，尋日主題嘅係「衰股」，即係舊年最衰嘅股反彈，藍籌第二衰嘅新世界發展（00017）升5.4%，百麗（01880）升4%，比亞迪（01211）升4.3%，中金國際（02099）升3.8%，二三線股亦有唔少「谷底」反彈，例如鐵貨（01029）同冠捷（00903）等。

鋼鐵股同航運股亦都翻生，但呢兩類股其實已反彈咗個幾月，鋼鐵股除咗炒鐵礦石降價同庫存周期之外，「美女」前日派成績表唱好今年需求，連期銅價格都即時反彈，鋼價今年初亦已稍為回升。相對馬鋼（00323）H股尋日升8.3%，馬鋼A股卻要微跌，滬綜指亦回軟近10點，今次阿爺手口並用，連鞍鋼（00347）高層都要捱義氣幫手買A股，但既然部署養老金入市，太早炒定先，豈不是要養老金接貴貨？

金魚缸千奇百怪，例如綠森（00094）突然發力下晝狂升五成，三點前仲發通告話不明升因，原來話阿媽嘉漢林業公布擺平咗班債權人，但只係豁免違約而並非唔使還錢。晨訊（02000）就大跌17%，隻股呢半年玩獨腳戲，舊年中期成績表見紅蝕1,875萬元，然後管理層預測下半年好轉，更開始每個月公布每月收入，結果七至十一月真係個個月有增長，但到十二月突然按月下跌47%，跟住發埋盈警，買二三線股真係千算萬算唔夠佢算。

航運板塊炒復甦

航運股抖一日又再發力，古勝尋日講過波羅的海乾散貨指數踏入一二年由1,800點跌到落1,300點，由於聖誕前趕出貨兼農曆新年提早，令航運需求谷前，但應付完旺季之後謝晒皮，以現時BDI水平，好多航運股都要蝕本，一一年成績表普遍亦唔樂觀。

但點解航運股仍餘勢未盡呢？一來花旗嘅經濟數據相當靚仔，而歐豬雖然差但已在預計之內，兩個因素加起來仍係正數。航運股名副其實係「衰股」，舊年衰足十一個月，經濟情況有轉機，變成復甦概念。另外，航運股計PB係歷來最低，即係所謂「爛船都有三斤釘」，秤吓啲釘嘅價錢之後，證券界又話航運股抵買，好似中國遠洋（01919）就比NAV折讓大約三成。

一方面PE唔慌好，另方面PB吸引，正所謂各花入各眼。但呢排孖屐氣氛好，正面因素蓋過負面，航運股有勢係短炒博反彈佳選，中遠突破4蚊之後，有機會挑戰下個阻力位4.5元。

古勝