絲絲講場：瑞士央行行長唔肯落台
捲入內幕交易疑雲嘅瑞士央行行長希爾德布蘭德，日前終於出嚟解畫，強調自己未有違規，拒絕為佢老婆卡什雅極具爭議性嘅外匯交易而辭職，仲反擊有關對佢指摘嘅政客。瑞士當局亦對希爾德布蘭德銀行交易資料點解外洩展開調查，可能掀起新一輪政治風波，似乎好戲還在後頭！
力撐無放料畀老婆
話說卡什雅喺上年八月中，將手上瑞郎兌換成超過50萬美元，點知唔夠一個月，瑞士央行就宣布瑞郎兌歐元「封頂」，令卡什雅大賺一筆。希爾德布蘭德就話，自己喺老婆買咗美元之後一日先知，仲話老婆做過對沖基金，對外匯走勢有自己嘅一套睇法，暗示唔使靠內幕消息搵着數。
話雖如此，希爾德布蘭德都覺得有做錯嘅地方，就係無將交易撤銷，至引起外界質疑，仲話已向一間瑞士慈善機構捐出7.5萬瑞郎。佢仲建議番央行理事會成員，超過兩萬瑞郎嘅交易事要先獲批准，以增加透明度。
至於揸住瑞郎嘅投資者就唔使擔心。有外匯策略員認為，呢次風波唔會影響瑞郎走勢。事實上，喺上任兩年嘅希爾德布蘭德掌舵下，央行對瑞銀同瑞信兩大行嘅監管都做得唔錯，大大降低佢哋嘅系統風險。