絲絲講場：李超人繼續富甲香港

《福布斯》話，全球經濟動盪，內地經濟增長放緩，房價下跌，前40名富豪喺二○一一年嘅財富總值，比對上一年減少7.4%，至1,510億美元。

以排頭位嘅首富李嘉誠為例，財富略為縮水8%至220億美元，第二、三位排名，出現少少轉變，恒地（00012）主席李兆基爬咗個頭，由第三位升上第二位，原本第二位嘅新地（00016）郭氏家族則跌落第三位。

彤叔身家急漲 排第四

至開心嘅相信係鄭裕彤（彤叔），因為估值神秘嘅周大福珠寶成功上市，估值變成有數得計，令彤叔身家大漲，達到150億美元，比起上年嘅90億美元，足足多咗60億美元，進身富豪榜第四位。

其他入榜富豪仲包括英皇集團主席楊受成，以9.6億美元身家排39位；思捷環球（00330）前大股東邢李亦以坐擁25億美元嘅身家，排係第15位。

梁安琪新入榜 位列21

絲絲對頭幾位排名，一啲都唔意外，絲絲反而留意到有一批富豪榜「新丁」，好似澳博（00880）執行董事，人稱「四太」嘅梁安琪，就排二十一位，財富約16億美元；喺金融界長袖善舞嘅朱李月華（朱太），佢間寶號金利豐（01031）已經借殼上市，喺二級配售市場相當活躍。

而莎莎（00178）大股東郭少明夫婦，以10.9億美元身家，位列35位；擁有國際時裝品牌Michael Kors嘅曹氏家族亦同樣入榜。

余絲韻