港股實施第二階段加時迫在眉睫，中小經紀紛紛作最後努力，希望能力挽狂瀾！繼七大證券經紀組織本月十六日約見未來特首外，成立咗幾個月嘅證券及期貨從業員工會，亦部署連串抗爭行動，更揚言唔排除罷市，要港交所收回成命！
全力支持工會今次行動嘅立法會議員王國興話，雖然唔排除罷市，但最希望都係港交所（00388）最終能聽取佢哋嘅意見。佢短期內會約見港交所主席夏佳理同行政總裁李小加，亦會約見財庫局局長陳家強，希望政府能介入事件，取消第二階段加時。
工會將會於下周四喺中環遊行抗議，副會長梁崇讓呼籲中小證券行老闆，喺嗰日下午五點，盡量放員工出嚟遊行，佢估可能有幾百名從業員參加。會長林德明仲形容，今次抗爭唔係為咗半小時嘅食飯時間，而係關乎到行業被「淹沒」，所以佢哋以「業界存亡 匹夫有責」嚟做今次遊行嘅主題。
今次遊行仲係出師有名o架，該會繼早前收集咗三千個反對加時簽名後，喺上周三至今個星期三再做問卷調查，訪問近五百名業界從業員同投資者等，顯示有八成六受訪者認為港交所冇諮詢次階段加時意見，同埋有九成九受訪者唔贊成次階段加時。
林德明話，首階段加時實施咗十個月，股市成交卻屢創新低，雖然外圍環境差，但佢覺得，相對○三年沙士時，依家經濟唔係咁差，但股市成交同股民入市意欲非常低迷，如果再推次階段加時，成交都唔會好轉；港交所要增強競爭力有好多方法，但唔使用加時。