「股神」巴菲特強項係投資，音樂細胞都好活躍，曾經露過兩手彈結他，娛吓賓。佢已決定喺年廿九嘅央視春節晚會獻唱。如果命運能選擇，你估佢會想做「股神」定「歌神」?
仲有兩個幾禮拜就到農曆新年喇。每逢除夕，內地央視都會製作一個大型電視晚會「春晚」。今年，中國網絡電視台仲打算將「春晚」上載到多個平台，包括網上電視、巴士電視同手機電視，令到更多人可以睇到。
近年繼續投資大陸嘅「股神」，都會喺節目上獻唱。晚會嘅主要監製王久平話，「大家都知道巴菲特投資厲害，其實佢唱歌都唔錯，佢專門錄製咗段用結他自彈自唱嘅片段，將在晚會上播出。」咁咪即係見唔到真人？「股神」喎，你估咁容易可以睇到佢表演咩！
要睇真人表演，做巴郡股東，兼且親身去股東會咪得囉。佢曾經喺股東會上，表演自彈自唱娛樂股東。
要成為股東又需要幾多入場費？用尋日巴郡A股嘅收市價115,210美元計算，接近90萬港元！畀入場費嚇親？唔怕，聽演唱會都有平飛啦，前年巴郡以1拆50拆細B股，當時每股3,247美元大平賣，急降至65美元，尋日收市價都只是76.8美元。咁平嘅價錢可以睇「股神」真人表演，就算係「山頂位」都超值啦！
除咗股東會，佢前年去大陸參觀比亞迪廠房，喺晚宴時同隨行翻譯員合奏，聞說嗰位翻譯曾經做過歌手，仲出過專輯，為「股神」嘅表現贏咗唔少掌聲。
余絲韻