市場熱線：瑞聲淡市有作為

恒指尋日升86點，喺A股咁唔爭氣嘅情況下，仲有得升已經算係唔錯，但尋日主要靠祖國移動（00941）同3大石油股，其他股票只係麻麻地，下跌股票仲多過上升股票200隻，成交得370億元，期指成交得4.4萬張，比平時正常少一半，連大戶戰場都水盡鵝飛。

內地創業板現股災

歐元又跌番到1.292，歐盟又話禁止入口伊朗石油，搞到金價油價上升。歐債危機正係「十個樽八個蓋」，擺明死路一條，但間唔中又好似有轉機引人落疊。阿爺停發央票抽水，即時令人憧憬會減RRR，A股靠內銀帶動曾經回升，但一點半開始倒插，滬綜指收市跌近1%再創近34個月新低，醫療、環保、電器股最傷，淨係靠內銀同石油股頂住，創業板就大跌5.6%，得唔夠一成股票上升，可以話係二三線股股災。

今日祖國召開全國金融工作會議，以前逢親開乜會物會，都憧憬有好消息公布，但今時唔同往日，阿爺一味話維穩，冇提放水已係壞消息，內房股呢排謝晒；阿爺繼續發揮輿論攻勢，話房企萬億還債高峰期將到，尋日表現最差係方興（00817）同綠城（03900），後者創下五十二周新低，管理層嘅新目標已轉變為「力求生存」。

家電股有買盤支持

傳聞商務部尋日會公布推動消費方案，但商務部長陳德銘結果只係話會研究家電新替代措施；又有報紙話會津貼保障房住戶買電器，可能都係雷聲大雨點小格局。尋日家電股仍有啲買盤，TCL多媒體（01070）發盈喜都升一餐，但公司舊年頭9個月已賺3.9億元，全年轉虧為盈都係新聞？

雖然阿爺成日話鼓勵消費，但呢排啲消費股愈跌愈低，百麗（01880）再跌到13蚊，百貨股被調低評級兼股價不振。內需消費股幾乎係長青金曲，唔少股民當係水泡，如果消費股都玩完，究竟仲有乜好買？

電訊股仍算做穩陣，出街可以唔帶身份證但唔可以唔帶電話，尤其「哎瘋」已令人上癮，雖然「三叔」近幾個月氣勢如虹，諾基亞亦鹹魚翻生，連國產貨都分一杯羹，不過個餅已大咗好多，所以蘋果產品仍係做唔切，據聞蘋果嘅代工廠喺新春期間都要加班開工，預備「哎pad3」出世。

手機設備股首選早已經唔係富士康（02038），而係瑞聲（02018），外資大行幾乎一致叫人「買入」，目標價普遍喺22蚊樓上。智能手機同平板電腦都係高增長行業，而且鬥靚聲鬥影相，瑞聲今年亦會供應揚聲器畀「三叔」。雖然智能手機同平板電腦將進入戰國時代，蘋果未必再能獨大，但話之你鬥生鬥死，瑞聲就漁人得利，到時「哎pad3」面世，隻股順理成章亦會炒一炒。

瑞聲預測PE約15倍，真係貴絕設備股，但亦因前景好所以值咁貴。隻股呢大半年似乎難以突破20蚊關口，但暫時可以炒住上落，假以時日實會突破。

古勝