二○一二年港股首日紅盤高收，仲要升成四百幾點，都算係意外驚喜，不過成交維持薄弱，只得三百億鬆啲，後市方向，仲係要等班大戶重新歸位之後，先至可以較為清楚。
市場憧憬中央新一年將有促進消費政策出台，昨日家電股表現突出，而從事冷氣機製冷劑業務的東岳（00189），亦同步反彈4.1%。睇番東岳過去一年股價大起大落，年中見過9.5元歷史高位，之後隨着製冷劑價格下挫，加上市況不就，一度跌近3元水平，年底反彈上7元樓上後又回軟，埋年收5.12元，昨日收報5.33元。
集團上半年度業績強勁，純利勁升逾4倍，至14.15億元人民幣，不過由去年的經驗，可知東岳股價極受製冷劑價格波動周期影響，而踏入第一季，冷氣機廠商開始為夏季的銷售作生產準備，帶動製冷劑需求回升，利好東岳，就算難以重演去年的強勁升勢，但在上半年仍然可以樂觀期待，短線上望50日線的6元阻力，支持位睇5元。
詩詩