呢排假期多，絲絲一於周圍覓食，喺一家位於馬頭圍嘅上海食肆入面，巧遇港交所（00388）嘅企業傳訊部主管羅文慧（Henry），佢一見到絲絲，即刻大讚絲絲真識食，並豎起大拇指勁讚呢間食肆水準高。絲絲奇怪Henry點解咁清楚嘅？一向低調嘅Henry隨即自揭緣由，佢話細個嘅時候喺馬頭圍鄧鏡波中學讀書，自然對呢區食肆零舍有感情啦。
講開呢家上海人開嘅食肆，專做街坊生意，知名嘅地道菜俯拾皆是，麻婆豆腐、酸辣湯、高力豆沙都令人食指大動。Henry一家人食完飯之後，佢仲同老闆娘閒話兩句，跟住上嘅甜品果然係高力豆沙。
Henry係上海人，自然對家鄉菜情有獨鍾。佢話有時朝早返工，都會揸架車專程到嚟買上海式早點，不單只咁，佢有時長跑keep fit，唔知係咪佢對馬頭圍街景有感情呢，佢會由九龍站屋企一直跑到去馬頭圍，最後梗係要食埋至走，認真長情兼念舊。