睇番上年咁多隻地產股，新世界發展（00017）嘅表現真係麻麻，股價全年跌咗成五成四，成為全年表現最差嘅恒指成分股第二位，唔知係咪同集團舊年全力搞周大福（01929）上市有關。
絲絲點解咁講呢？因為外電就搵到彤叔嘅好友，講集團有好多營運彤叔已經放手畀其他人打理，唯獨同周大福有關嘅就親力親為，仲經常「微服出巡」落舖𥄫到實一實。
八十六歲嘅彤叔，直頭當正周大福係親生仔一樣，《華爾街日報》引述佢其中一名好友講，○九年佢哋一齊喺上海，彤叔着住西裝，踢住佢至愛嘅Nike波鞋同呢位好友去行街，睇嘅當然係周大福上海分店啦。
事前分店嘅職員完全唔知。期間彤叔表現得頭腦靈活，間舖有幾多存貨、珠寶賣幾多錢佢完全一目了然，喺佢面前真係冇人敢偷懶。
不過，彤叔都有佢親民嘅一面，另一位好友就話，新世界公司Canteen午飯時間，仍然保留傳統金舖所有職員同老闆坐埋一齊食住家飯嘅傳統。彤叔經常坐喺唔同人嘅旁邊一齊食飯、傾閒偈，形象絕對唔係高高在上嗰種，有呢種老闆又幾好喎。