市場熱線：創維買定貨等開車

「一月效應」有兩個意思，有興趣可以自己google吓。舊年的確唔少人已意興闌珊清貨過年，諗住新一年再作部署，但想執平貨冇咁易，第一日開波就挾高，搞到你十五十六。唔少專家預測今年會先苦後甜，根據相反理論，年初會唔會反而有甜頭呢？如果係先低後高，個個在首季儲貨，個市又點會跌呢？炒股就好似捉棋咁樣，經濟學叫「博弈」，大戶最叻玩心理戰。

大戶心理最難捉

恒指尋日勁升443點，成交回升至328億元，但仍然唔算多，散戶都係唔夠膽追貨。而國指更升超過3%，主要係兩大石油石化股犀利，中石化（00386）更創去年二月以來新高，市傳成品油定價機制改革就快扑錘，呢個消息已傳過N次，但最近電費同燃氣費已先後改革，成品油下游同上游接軌係天經地義，所以咪話冇機。

歐洲PMI有少少好轉，但出口股已率先翻生，利豐（00494）、招商局（00144）、中遠洋（01199）升幅係藍籌股中最勁，而航運股仍未斷氣，汽車股同飛機股亦得。不過，大升市仍有400隻股票下跌，多數都係細價股，既然大中價股都咁平，新一年換馬亦係正常。

另一理論係舊年跌得最殘嘅股會報復性反彈，即係俗稱「狗股」，尋日有比亞迪（01211）同中金國際（02099）都合乎條件，但舊年最勁嘅中廣核（01164）尋日再升近一成。

本港十一月零售消費值按年升23.5%，好多商場同零售店紛紛同聖誕新年計數，普遍話剛過去嘅佳節生意增長兩成左右，其實扣埋通脹唔算好勁，亦較舊年頭三季有回落，周大福（01929）雖然升到上市以來新高，但仍係潛水。

除咗傳成品油定價改革同春節前會減RRR之外，內地亦盛傳商務部呢個禮拜會推新促進消費政策，尤其家電以舊換新啱啱到期，祖國會推新家電政策，所以國美（00493）、創維（00751）、海爾（01169）一齊發威。其實家電下鄉同以舊換新一直以來都好成功，要刺激消費何需以「新」換「舊」（政策）？但無論有冇新政策，以上3隻股已經好平。

3D電視拓新財路

創維今年預測5倍幾，息率有5厘，的確相當吸引。隻股由舊年十一月嘅4.3元跌到年尾嘅2.7元，其實唔算有乜特別壞消息，中期成績表賺多30%，但稍低過預期，然後同LG嘅合營延期，但創維未出過錢所以冇損失，而舊年十一月電視銷量增長大幅放緩到10%，但其實賣出電視85.4萬部，比十月份高出一成。

證券界擔心創維全年度銷量唔能夠達標，尤其未來冇咗優惠政策扶持，但股價已反映未能達標因素，反而增添值博率。而且，創維𠵱家重點係提升毛利率而非谷銷量，如果3D LED電視賣得好就乜都補番晒。中央電視台啱啱推出咗第一條3D頻道，而今年倫敦奧運亦會以3D形式播出，遲吓睇波都要3D，所以3D電視將會係一條財路。

古勝