今年工作繁多，成日出入媒體，年尾除咗檢討得失之餘，有時都要放鬆一下！股市方面，二○一一年真係多事之年，好多股票都跌到好殘；喺依家個市場入面，不妨發掘一些價低質優嘅股票。
中興通訊（00763）主要業務係設計、開發、生產、分銷同安裝各種先進電訊設備（營運商網絡、手機同電訊軟件系統等等）。集團近年不斷發展高檔次市場，提高自己嘅毛利率，令規模同盈利同步增長。
中興通訊技術上配合國家嘅「十二五」政策，包括「三網融合」同「物聯網」建設，配套上實施雲計算建設、完善室內覆蓋同無線接入；能夠配合政策嘅公司，當然喺內地市場市佔率方面有優勢。集團嘅T8000、M6000等高端數據設備以及智能終端設備亦獲得市場歡迎，可以話係錦上添花。
集團同時亦努力拓展國際市場，面對日益多變嘅國際形勢，國際市場方面嘅業績仍持續增長。產品上，集團嘅系統產品已打入德國、比利時、匈牙利同奧地利等高端市場，其他公司例如法國電訊、南非MTN、美洲移動、荷蘭皇家電訊、和黃（00013）等主流營運商，都逐步同集團合作。
另外，集團終端產品亦成功向美國四大營運商同日本市場埋手。集團既生產電訊設備，亦生產中低價智能手機，喺通訊市場上極具競爭力。
數據方面，集團近幾年業績持續增長，現價市盈率約21倍，反映高增長概念。繼續追蹤，出發！