股神巴菲特投資旗艦巴郡每年五月搞股東會係盛事，吸引超過三萬人湧去奧馬哈朝聖，揸住四十億美元巴郡股權嘅富達投資亦唔例外，基於發問環節一題難求，佢哋就使出疑似「種票」策略搶問，結果畀股神發現，仲點名訓話，話佢哋霸晒股東發問機會，玩寸個party！
富達向來好重視巴郡年度股東會，年年派出由資深以至新進員工到場，提升吓投資視野，以往股東會發問環節都係以「爭咪」形式進行，輪到富達員工爭到咪嗰陣，啲關鍵問題已經畀人問晒，剩番股神個人習慣、睇書心得等呢啲花邊嘢。
巴菲特三年前以避免釀成混亂為由，改為用抽籤方式抽出發問者，富達就出動人海戰術，今年就派咗超過四十個代表，滲入唔同位置嘅群眾裏面，抽中發問時只表明姓名同埋家鄉，唔講自己係富達人，結果二十七條公眾抽籤問題中，富達成功搶到六條，再有兩條透過記者代問。富達聲稱咁做係為咗問啱問題，等佢哋對企業作最準確嘅分析。
巴菲特後來發現咗富達「種票」，就話：「富達被抽中提問機率咁高，無疑佢哋深明發問環節嘅遊戲規則，我並唔欣賞呢種做法，唔符合股東會嘅宗旨…不過，我無責怪佢哋，若果我仲係後生都可能會好似佢哋咁搏。」展望明年五月五日股東會，巴菲特將會減剩三分之一嘅問題交畀公眾發問。