市場熱線：統一業務逐步改善

不過，亞洲魚缸尋日大部分冇陪跌，皆因美股期指先行回升，恒指要跌120點已係區內最差，連期指結算日都冇乜波幅，下月期指低水86點，成交唔夠4萬張。今日係一一年嘅最後一個交易日，已經唔使寄望乜嘢粉飾櫥窗，通常除夕得半日市挾上會較容易，但今日開足全日，而好淡友已齊齊提早收爐。

玩半新股見好要收

睇見個市真係悶到瞌眼瞓，尋日成交有291億元，唔使日日創成交新低紀錄，但上海A股尋日創三年成交新低，美股雖然今年威盡全球魚缸，但成交亦一直淡靜，出年更加不敢想像。港股尋日靠幾隻本地地主股撐住，但內房股就大回吐，淨得恒盛（00845）唔知點解逆市發圍。

高鐵溫州事故完成調查報告，搵到人孭鑊，鐵路A股當好消息炒，本地上市鐵路股仍係普遍捱沽。個市靜英英，炒埋啲「圍飛作歹」嘅半新股，包括金寶寶（01239）、華油（01251）同埋動感集團（01096），其實好多連個名都冇乜印象。個名同業務都唔重要，入飛股民可以當賭大細，買中天瑞（01252）同織材（03778）則中獎，但有得升亦要識得食胡，織材尋日一度重返招股價。

蒙牛（02319）前日未派完貨，尋日再插7.4%，蒙牛短期銷量肯定銳減，中長線應該可以慢慢恢復，但難得呢兩日咁多散戶趁低吸納接貨，大孖沙乘機清貨大行動。祖國飲品市場一向競爭激烈，蒙牛竟然自廢武功，飲奶市場有排療傷，汽水市場有康師傅（00322）孖住百事走去同可樂拗手瓜，其實飲品最好賣係涼茶嘅王老吉，廣藥（00874）打緊官司就快有結果，其他品牌好難爭。至於茶同果汁飲品則百花齊放，個餅亦大到不得了，康師傅、統一（00220）、娃哈哈、可樂爭到頭崩額裂。

明年或炒復甦概念

古勝一向提醒大家，食品股存在風險，但三隻台資食品股卻鬼打冇咁精神，有兩隻仲染埋藍，古勝一直有推介康師傅同旺旺（00151），但統一比較少，今年講業績同股價的確較差（相比嗰兩隻），但出年應該有轉機，儲番啲貨等出年收割。三大食品股今年都係毛利率下跌，但營業額都有顯著增長，即係如果原材料同產品售價回復正常嘅話，佢哋嘅盈利會再升至高峰。其中，統一上半年賺少40.8%跌得最多，但營業額增長42.8%亦係升得最多。

旺旺嘅產品同市場定位比較唔同，但統一同康師傅就好多產品打對台，包括即食麵、樽裝茶同果汁飲品等，統一樣樣都唔夠爭，唯獨奶茶市佔率超過一半，但相信個市場其實好細。

統一嘅市值只及康師傅12%，但預測PE超過30倍竟然拍得住，睇落好唔合理，但統一未來盈利仍有好大改善空間，即食麵業務已轉虧為盈，出年隨時炒復甦概念。

古勝