唔知大家記唔記得，互聯網巨企Google喺今年九月時曾經推出過社交網站Google+，用嚟同facebook打對台呢？原來唔經唔覺，Google+近幾個禮拜嘅開戶口人數，達到每日62.5萬人，估計到明年底，總用戶會上到4億人，係依家facebook用戶人數嘅一半。
一家獨立研究公司Ancestry.com，喺過去幾個月一直追蹤住Google+嘅資訊同埋數據。發現十二月至今，Google+嘅開戶數目大增近25%，平均每日「上客量」達62.5萬人。研究公司發言人就話，開戶人數上升，好可能同多咗人用Android手機有關，而為咗增加玩Google+嘅趣味性，好多人開戶後都會邀請親戚朋友一齊加入，壯大咗開戶數字。
facebook雖然擁有8億用戶，但面對Google呢個實力雄厚嘅對手，真係唔能夠鬆懈。不過facebook嘅上市大計就一直只聞樓梯響，facebook管理層上個月就講過，希望藉上市籌集100億美元做擴展，但絲絲就覺得，facebook經已錯過咗上市嘅最佳時機，未來經濟又冇起色，睇嚟呢100億吸金夢短期內都幾難實現喇！