今日開始招股嘅滙力資源（01303），尋日開IPO記者會，咁開心嘅日子，佢哋主席王大勇就梗係周圍social吓，派吓卡片咁啦。絲絲去湊熱鬧嘅同時，都有埋去同佢傾兩句，點知拎完佢張卡片睇一睇，就發現原來張卡片好特別o架喎！
點特別法呢？王總呢張卡片，唔似普通卡片咁用紙做，而係用好似八達通咁嘅材料整嘅，上面仲布滿咗雷射印紋，有埋王總嘅相，望落去直頭成張智能身份證咁呀！
王總就話，佢呢張卡片係朋友特別造畀佢，賀佢公司上市，仲話係限量版，只係做咗50張咋！佢趁尋日開記者會，特登拎出嚟派吓，以紀念呢個咁特別嘅日子。
王大勇年僅45歲，係滙力最後生嘅董事，佢既係執董，亦都係公司主席。